halawet el moled box

اسمي هند محمد ثابت بكالوريوس تربية فنية ٣٥ سنة حاليا - سنة ٢٠١٨

انا زوجة وام لاربعة ابناء

كان عندي حلم اني اعيش حياة ناجحة مافيهاش مشاكل واربي اولادي كويس ويبقوا ذرية صالحة

بس ولادي كانوا بيتعبوا كتير وكنت لازم اروح للدكتور كل اسبوع بحد فيهم وساعات بالتلاتة عيانين

بدات اتعب كل شوية علي فترات وبدات يجيلي امراض غريبة ومش متناسبة مع سني

التهاب اعصاب وخشونة مفاصل ونقص حاد في الكالسيوم مع هبوط فجائي في الضغط وصداع نصفي رهيب يوميا تقريبا

اخرهم جالي التهاب شديد في الغدة الدرقية وسكري بيوطي بيبقي ٣٠ ويجيلي اغماء حتي لو انا سايقة ودي كانت مصيبة والدكاترة الكبار اجمعوا اني هعيش بالدوا طول حياتي لان الغدة مالهاش علاج

وشوية تبقي نشطة جدا جدا وشوية تبقي كسلانة جدا جدا واخد اقراص كتير يوميا من الدوا بتاعها طبعا مينفعش اوقفه

وكمان ظهرلي اورام بس الحمد لله حميدة والدكتور قالي خدي بالك من اكلك لان عندي تاريخ مرضي بالسرطان والاورام دي فيه احتمال انها تبقي خبيثة

عدي عليا شهور كنت في السرير مبتحركش لازم حد يسندني وعايشة بس عالحقن والادوية شنطتين مليانين

حسيت ان حياتي اتملت دكاترة وادوية تعبانة علطول مش عارفة اعمل حاجة ما اقدرش اشيل صينية غير لما تقع

مش عارفة اراعي اولادي ولا بيتي

وهما وزوجي اللي شايلني

دي كانت بجد اصعب فترة عدت عليا في حياتي كلها

اتحسنت شوية ونسبة الغدة اتظبطت شوية بقيت بتحرك

نزلت جيم وبالصدفة شفت فيديو بتاع دكتور ريموند فرانسيس وازاي بقي في سنه ده بدون امراض فقط بمنعه للسكر والحجات المضرة

حسيت ان الامل لسة موجود

بدات امشي علي نفس الخطوات وقفت اكل الحجات اللي ممكن تضرني واخد كورسات تغذية واعرف اكتر عنها واجرب وافشل لحد ما نجحت

حبي للطبخ خلي موضوع اني استخدم البدائل اسهل بكتير مع كمان اني واخدة كورسات طبخ

انا وقفت الاكل المضر كله في يوم وليلة

مشيت عالنظام ده شهور وزوجي واولادي انضموا ليا الحمد لله

بعدها حياتي مشيت للاحسن

انا مش مريضة الحمد لله

مباخدش ادوية لاي حاجة ولا حتي اسبرين

ولادي مبيروحوش للدكتور كل شوية نعمة وفضل من عند ربنا

زوجي خس ووصل للجسم اللي كان نفسه فيه

طاقة جسمي عالية وبصحي نشيطة جدا

بعرف اراعي بيتي وعيالي

ما عنديش اورام كلها راحت معرفش ازاي

ما عنديش غدة و بعمل تحاليلي كل ٦ شهور بانتظام بقالي اكتر من سنتين الحمد لله

موقفة سكر ودقيق ابيض واسمر وكامل ومشتقات القمح والذرة والرز الابيض وكل ما هو معدل وراثيا

بدلت كل ده بخضار وفاكهة اورجانيك وبدائل صحية للدقيق زي جوز الهند والشوفان وبدايل للسكر زي العسل الابيض والتمر وفيه بدايل تانية كتيييير

نفسي وبحلم ان كل الناس تعرف ان الاكل هو السبب الرئيسي في اننا نتعب ونمرض او نعيش بصحة كويسة

نفسي الناس تعرف ان الاكل اللي بيتعمل في البيت افيد واطعم

وممكن يتعمل في وقت قليل

وممكن يتعمل باقل التكاليف

وممكن يعيشوا حياتهم مبسوطين بدون امراض نفسية او عضوية

حياتنا حلوة بس احنا اللي بنبص ازاي نخليها وحشة

الشهادات والخبرات

بكالوريوس تربية فنية بدرجة امتياز مع مرتبة الشرف

هيلث كوتش معتمدة من اكاديمية دكتور سيرز بامريكا

عضو بجمعية الطهاة المصريين

شيف معتمد من جمعية الطهاة المصريين

شهادة معتمدة من جمعية الطهاة المصريين في حساب تكلفة الاغذية

شهادة معتمدة من جمعية الطهاة المصريين في تصميم وتخطيط قائمة الطعام

شهادة معتمدة من جمعية الطهاة المصريين في التغذية الصحية السليمة

PEAT و EFT شهادة في تحرير المشاعر النفسية بتقنيتي